Глас 6. В четверг утром. Тропари и стихиры на каждый день

Седа́льны апо́стольски. Гла́с 6:

Я́ко посреде́ ученико́в Твои́х, прише́л еси́, Спа́се, ми́р Тво́й дая́ и́м: прииди́ и к на́м, и спаси́ на́с.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Ученико́в Твои́х ли́к вселе́нную просвети́: бы́вше бо иногда́ ловцы́ ры́б, ны́не же челове́ков бы́ша: те́х ра́ди, Бо́же, поми́луй на́с.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Мно́гая мно́жества мои́х, Богоро́дице, прегреше́ний, к Тебе́ прибего́х, Чи́стая, спасе́ния тре́буя: посети́ немощству́ющую мою́ ду́шу, и моли́ Сы́на Твоего́, и Бо́га на́шего, да́ти ми́ оставле́ние, я́же соде́ях лю́тых, еди́на Благослове́нная.

Седа́льны. Гла́с 6.

Ученицы́ Твои́, Спа́се, в концы́ земли́ посыла́еми, язы́ки благоче́стно я́ко ры́бы улови́вше, приведо́ша Твое́й бла́гости. Те́х ра́ди у́бо вопие́м Ти́, Христе́: лю́дем твои́м пода́ждь ве́лию ми́лость.

Сти́х: Испове́дят Небеса́ чудеса́ Твоя́, Го́споди.

Двоенадеся́тица апо́стол, Го́споди, двоенадесятолу́чная я́ко Со́лнце яви́ся земли́: те́х бо ра́ди увяди́л еси́ пре́лести израсти́теля: те́х ра́ди озаря́еши ду́шы Твои́х рабо́в: и на́с и́х ра́ди спаса́й, я́ко Благоутро́бен.

Сти́х: Ди́вен Бо́г во святы́х Свои́х, Бо́г Изра́илев.

Го́споди, святы́х Твои́х па́мять дне́сь яви́ся, я́ко ра́й, и́же во Еде́ме: в не́й бо ра́дуется вся́ тва́рь, и подае́ши на́м те́х моли́твами ми́р и ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Всесвята́я Богоро́дице, во вре́мя живота́ моего́ не оста́ви мене́: челове́ческому предста́тельству не вве́ри мя́: но сама́ заступи́, и поми́луй мя́.

Седа́льны. Гла́с 6.

Во всю́ зе́млю я́ко мо́лния прему́дрых ученико́в Твои́х, Влады́ко Христе́, изы́де спаси́тельное веща́ние, и озари́ су́щыя во тьме́ и лю́тых, сы́ны дне́ и све́та на́с соде́лавшее. те́мже Тя́ вся́ тва́рь благоче́стно сла́вит.

Мре́жею Боже́ственныя ве́ры лю́дие преврати́вше ры́барие, из глубины́ су́етства извлеко́ша все́х, и преда́ша и́х Бо́гу, благоче́ствующих, и того́ при́сно велича́ющих.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Свята́я Влады́чице, Христа́ Бо́га на́шего Ма́ти, я́ко все́х Творца́ неизрече́нно ро́ждшая, моли́ со апо́столы свяще́нными всегда́ бла́гость Его́, страсте́й на́с изба́вити, и оставле́ние на́м да́ти грехо́в.

На стихо́вне стихи́ры апо́стольски, гла́с 6:

Бу́рю утиши́вше ле́сти бесо́вския му́дре в тишину́, Апо́столи Христо́ви, ве́сь ми́р наста́висте в ве́ру правосла́вную, и ны́не моли́теся о душа́х на́ших.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Па́мять прему́дрых учени́к Христа́ Царя́ на́шего, досто́йно пе́сньми почти́м, ве́рнии: ти́и бо тро́ическую ве́ру в ми́ре пропове́даша.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Избра́нныя удиви́ и святы́я Бо́г на́ш. Ра́дуйтеся и весели́теся, вси́ раби́ Его́, ва́м бо угото́ва венцы́ и Ца́рствие Свое́: но мо́лим вы́, и на́с не забу́дите.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Преложе́ние скорбя́щих, премене́ние боля́щих еси́, Богоро́дице Всепе́тая, спаси́ гра́д и лю́ди, бори́мых умире́ние, обурева́емых тишина́, еди́на предста́тельнице ве́рных.

Блаже́нна, гла́с 6:

Помяни́ мя, Бо́же Спа́се мо́й, егда́ прии́деши во Ца́рствии Твое́м, и спаси́ мя, я́ко еди́н Человеколю́бец.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Я́ко лучы́ та́йныя, проте́кше в ми́ре апо́столи сла́внии, челове́ческий ро́д ве́рою просвети́ли есте́.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Я́ко о́блацы окропи́ли есте́ во́ду в ми́ре, Боже́ственнаго ра́зума, просвеще́ннии Госпо́дни Апо́столи.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Муче́ния огню́ приближа́ющеся, Боже́ственную ро́су прохлажда́ющую ва́с, от Бо́га восприя́сте, му́ченицы.

Сла́ва Отцу́ и Сы́ну и Свято́му Ду́ху:

Святе́й и честне́й Тро́ице, ве́рнии покланя́ющеся, согла́сно возопии́м: Апо́стол мольба́ми спаси́ все́х на́с.

И ны́не и при́сно и во ве́ки веко́в. Ами́нь:

Богоро́дичен: Ро́ждшая Сло́во па́че словесе́, Богоро́дице, отцу́ собезнача́льнаго, того́ моли́ спасти́ся душа́м на́шым.